Эхнэрээ 8 цагийн турш тамлаж хөнөөсөн Казакстаны Эдийн засгийн сайд асны шүүх хурал дэлхий нийтийг цочроож байна
Өнгөрөгч 2023 оны 11 дүгээр сард Астана хотын "Бау" ресторанд амь насаа алдсан Салтанат Нукеновагийн хэрэг дэлхий нийтийг цочроогоод байна. Учир нь түүнийг өөрөөс нь 12 насаар ах, Казакстаны Эдийн засгийн сайд асан нөхөр Куандык Бишимбаев 8 цагийн турш зодож, тамлан хөнөөсөн аймшигт хэргийн материалууд энэ өдрүүдэд ил болж байгаа юм.
Куандык Бишимбаев өмнө нь хоёр удаа гэрлэж байсан, хоёр хүүхэдтэй. Гурав дахь эхнэр болох Салтанатыг инстаграмаар анх харснаасаа хойш 6 сарын турш уулзах, болзох оролдлого хийж уйгагүй эргүүлсэн. Гэвч Нукенова эхэндээ түүнтэй уулзмааргүй байгаагаа найзууддаа ярьж байсан. Улмаар 2022 оны зун түүнтэй уулзахыг зөвшөөрч, удалгүй гэрлэжээ. Бишимбаев гэрлэснээсээ хойш түүнд гар хүрч, гарч орохыг хориглон, өөрийнхөө хяналтад байлгах болсон. Эцэст нь гэрлэсэнээсээ хойш 9 сарын дараа буюу 2023 оны 11 сард эр нөхрийнхөө гарт харамсалтайгаар амиа алдсан. Хэрэг гарсан өдөр тэрбээр нөхрөөсөө салах хүсэлтэй байгаагаа хэлсний улмаас Куандык Бишимбаев түүнийг үеэлийнхээ рестораны VIP өрөөнд 8 цагийн турш зодож, аминд нь хүрчээ.
Дэлхий нийтийг цочроогоод буй энэ хэргийн 6 дахь шүүх хурал Бүгд Найрамдах Казахстан Улсын нийслэл Астана хотод өчигдөр /2023.04.10/ болсон юм. Хэрэг явдал өнгөрсөн оны 11-р сард гарсан ч тус газрын камерын бичлэг энэ сарын 03-нд л ил болсон байна. Шүүх хурлын үеэр Бишимбаев “Би буруугаа хүлээн зөвшөөрөхгүй байна. Салтанатыг хэзээ ч тамлаж байгаагүй” гэж хэлсэн нь олны бухимдлыг төрүүлээд байгаа юм.
Тэрбээр өмнө нь улсаасаа 7.2 тэрбум төгрөгийн авлигын хэргээр ял эдэлж байсан ч Казакстаны ерөнхийлөгч асан Назарбаевын өршөөлөөр суллагдаж, 10 жилийн хорих ялаас мултарч байжээ.
Дашрамд дурдахад НҮБ-аас Казакстан улсад жил бүр гэр бүлийн хүчирхийллийн улмаас 80 орчим эмэгтэй нас бардаг ч энэ тоо 400 хүрэх магадлалтай гэж мэдээлжээ.
