Э.Батшугарын сүйхээтэй сүйт бүсгүй Б.Янжиндулам
“U” фильмийн “Амьдралоги”, найруулагч Б.Амарсайханы “Mongolian connection” зэрэг кинонд тоглож уран бүтээлийн гараагаа эхэлсэн жүжигчин Б.Янжиндулам сүүлийн үед жүжигчний карьер хөөхөөс бизнес эмэгтэй байхыг илүүд үзэж буй. Учир нь тэрбээр “Adore” хэмээх тансаг зэрэглэлийн цэцгийн дэлгүүр ажиллуулдаг. Харин түүнийг экс ерөнхийлөгчийн бэр болмогцоо урлагаас хөндийрсөн гэх “бор шувуу” нисдэг аж. Учир нь УИХ-ын гишүүн Э.Батшугар, Б.Янжиндулам нар өнгөрсөн 2022 оны наадмаар харилцаагаа олны өмнө ил гаргаж, тэр ч бүү хэл 2023 онд албан ёсоор сүй тавьж байв. Энэ үеэс тэрбээр дахин тайз, дэлгэцийн уран бүтээлд тоглоогүй. Уг нь Өмнөд Солонгосын Үндэсний урлагийн их сургуулийн шилдэг төгсөгч болж, сургуулийнхаа нэрэмжит бөгжөөр шагнуулж, тэр ч бүү хэл Солонгосын алдартай жүжигчидтэй тайзнаа хамт тоглож байсан чамбай авьяаслаг эл бүсгүйгээс урлагийн тогооныхон битгий хэл урлагт дуртай үзэгчид ч сонирхолтой дүрүүдийг хүлээж байсан болов уу.
Сонирхуулахад, жүжигчин Б.Янжиндулам спортын гимнастикийн Олон улсын хэмжээний мастер цолтой бөгөөд улсын шигшээ багийн тамирчин байжээ. Түүнчлэн түүний төрсөн дүү нь “Love”, “Me n U” гэх зэрэг дуунуудаараа сонсогчдын танил болсон залуу артист Doid буюу Б.Доржнанжид юм.
