Б.Батцэцэг: Гаднын оронд очсон бол тэр улсын дүрмээр л амьдарна. Гэтэл тэнд Монголдоо байгаа юм шиг хэрүүл хийж байгаад бүхнийг дийлнэ гэсэн ойлголттой байж болохгүй!

БНСУ-д зорчиж буй Монгол иргэд хил дээрээс буцаагдаж байгаа асуудлыг Гадаад харилцааны сайд Б.Батцэцэгээс тодрууллаа.

Тэрбээр, “Аливаа улс виз олгоно гэдэг хилээр оруулна гэсэн баталгаа биш. Улс орон бүрт өөрийн хил гаалиар нэвтрүүлэх дүрэм журам гэж бий. Манай улсад ч гэсэн байгаа. Манай улсын хил дээрээс ч бас гадны иргэд зөндөө буцдаг. Өнгөрсөн жил гадаадын 1700 иргэд буцсан байдаг. Дүрэм журамд нийцэхгүй шаардлага хангахгүй зөрчил гаргасан гадны иргэдийг буцаадаг. Дэлхийн бүх улс ийм хууль дүрэмтэй.

 Солонгосын хил дээрээс ганцхан монголчууд биш гадаадын олон иргэн буцдаг. Манай улс иргэдийнхээ буцаалтын тоогоор 13 дугаарт орж байна.

Иргэдийн буцдаг шалтгаан нь тодорхой. Виз зуучлалын төвөөр мэдүүлгээ өгч бөглүүлэхдээ өөрсдөө маш хариуцлагагүй ханддаг. Ямар хаяг дээр очих, хэзээ буцаж ирэх, зорилго зэрэг нь тодорхойгүй гэдэг шалтгаанаар буцна. Хоёрдугаарт хууль бус бараа тээвэрлэдэг.  Зорчих гэж буй улсынхаа хууль дүрмийг судалж, хариуцлагатай аялах ёстой. Мэдээлэл маш их бий. Монголчуудад зориулаад монгол хэл дээр анхааруулга, санамж, мэдүүлэх хуудсаа яаж бөглөхийг нь хэлж өгдөг, монгол хэлтэй хүн ажилладаг, зураг авдаг төхөөрөмж нь хүртэл монголоор ярьдаг.

Бүх л улсаас хүмүүс очиход хууль дүрэм нь ижилхэн үйлчилнэ. Түүнээс биш монголчуудыг онцолж аваад үзэн ядаад буцаагаад байгаа юм биш. Жилд 200 гаруй мянган иргэн орж гарч байгаа.

Олон нийтийн сүлжээгээр болон хэвлэл мэдээллээр явж буй мэдээллүүд нэг талыг барьж байна. Усыг нь уувал ёсыг нь дага гэж үг бий. Гаднын улс оронд очиж байж тэр улсын дүрмээр л амьдарна. Гэтэл Монголдоо байгаа мэт хэрүүл хийж байгаад бүх юмыг дийлж болно гэдэг ойлголт байж болохгүй. Улс орны нэр хүнд шүү дээ.\ Монгол хүн өөрөө хариуцлагатай байх ёстой. Ухамсартай соёлтой аялж сурах хэрэгтэй. Зорилгоо зөв тодорхойлох ёстой.

Очих буудлынхаа хаяг, дансны үлдэгдлээ мэдэхгүй, виз авахдаа мэдүүлсэн мэдээллээсээ өөр юм ярьдаг, хууль бусаар амьдарч байгаа хүний гэрийн хаягийг өгчихдөг гээд зөрчлүүд нь тодорхой байдаг.

Буруутныг айлын талаас хайх биш юм. Хамтын ажиллагаа бүх чиглэлээр хөгжиж байна. Ажиллах амьдрах таатай орчин байгаа учраас тийшээ хүмүүс тэмүүлж байна. Өнөөдөр 60,000 гаруй монгол хүн БНСУ-д амьдарч байгаагийн 20,000 гаруй нь оюутан. Хууль бусаар амьдарч байгаа монголчууд зөрчил гаргахгүй бол шууд барьж аваад буцаагаад байдаггүй. Бусад улс оронтой харьцуулахад монголчуудад харьцангуй сайн ханддаг” гэлээ.

Түүнчлэн тэрбээр харилцан визгүй зорчих, визийн нөхцөлийг хөнгөрүүлэхээр таван жил гаруй хэлэлцэж байгаагаа дурдаж байв.