Ким Жон Уны залгамжийг авахаар яригдаад буй Gucci-гийн нарны шил зүүдэг урт үстэй Ким Жү А гэж хэн бэ?

Урт үс засуулахыг Хойд Солонгос улсад хориглодог. Барууны тансаг брэндийн хувцас өмсөх нь бараг хэн бүхэнд хүршгүй зүйл.

Гэвч энэ бүх хязгаарыг үл тоон, ямар ч шийтгэлгүйгээр давж чаддаг ганц хүн бий. Тэр бол Хойд Солонгосын удирдагч Ким Жон Уны охин Ким Жү А. Сүүлийн жилүүдэд тэрээр эцгийнхээ хажууд улам ойр ойрхон, олон нийтийн арга хэмжээнд ч их оролцох болсон. Одоо National Intelligence Service (Өмнөд Солонгосын Үндэсний тагнуулын алба)-ын мэдээлснээр, Ким Жон Ун охиноо өөрийнхөө дараагийн залгамжлагч болгохоор зэхэж байгаа аж.

Хэрэв энэ үнэн бол Кимийн удмын династи дөрөв дэх үедээ үргэлжлэх нь.

Тэгвэл Ким Жү А хэн болох, түүний эрх мэдлийн оргилд хүрэх замнал болон Хойд Солонгосын ирээдүйд юу өгүүлэх талаар тоймлон хүргэж байна.

Ким Жү А гэж хэн бэ?

Ким Жү А түүний жинхэнэ нэр мөн эсэх нь ч тодорхой биш. Тэрээр Ким Жон Ун болон түүний гэргий Ri Sol Ju нарын албан ёсоор батлагдсан цорын ганц хүүхэд юм. Гэвч түүний тухай бусад мэдээлэл тун хомс.

Тэр ч бүү хэл яг хэдэн онд төрсөн нь тодорхойгүй байдаг. Өмнөд Солонгосын тагнуулын байгууллагын тооцоолсноор тэр өдгөө 13 орчим настай. Хойд Солонгосын төрийн хэвлэл анх 2022 онд түүнийг эцгийнхээ хамт тив алгасах баллистик пуужинг шалгаж буй зургаар нийтэд харуулсан. Түүнээс хойш тэр зэвсгийн туршилт, цэргийн парад, үйлдвэрийн нээлт зэрэг чухал арга хэмжээнүүдэд тогтмол оролцох болсон юм.

Заримдаа тэр Gucci-гийн нарны шил зүүж, урт үстэй харагдах нь олны анхаарлыг татдаг. Тэрээр өнгөрсөн жил эцгийнхээ хамт Бээжинд айлчилж, Хятадын удирдагч Ши Жиньпинтэй зургаан жилийн дараах анхны дээд хэмжээний уулзалтад оролцсон байдаг.

Тэр үнэхээр дараагийн удирдагч болох уу?

Өнгөрсөн сард Ким Жү А гэр бүлийнхээ бунханд анх удаа зочилсон. Тэнд түүний өвөө Kim Jong Il болон элэнц өвөө Kim Il Sung нарын занданшуулсан шарил хадгалагддаг. Шинжээчдийн үзэж буйгаар энэ бол улс төрийн маш тодорхой мессеж байв. Өмнөд Солонгосын Үндэсний тагнуулын алба парламентын гишүүдэд өгсөн хаалттай танилцуулгад, Ким Жү Аг эцгийнх нь дараах удирдагчаар “дотооддоо томилох шатандаа явж байна” хэмээн мэдээлжээ.

Зарим гишүүдийн мэдээлснээр, тэрээр олон нийтийн арга хэмжээнүүдэд бодлогын түвшний үүрэг гүйцэтгэж эхэлсэн бөгөөд бодитоор бол хоёр дахь хамгийн нөлөө бүхий хүн мэт харьцуулж байгаа аж. 

Сонирхолтой нь, Ким Жон Ун өөрөө 2010 онд, ердөө 26 насандаа албан ёсоор залгамжлагчаар нэрлэгдсэн. Эцэг нь хүнд цус харвалт туссаны дараа түүнд 2011 онд гэнэт төрийн эрхийг шилжүүлсэн түүхтэй. Зарим шинжээчийн үзэж буйгаар, охиноо эртнээс олон нийтэд танилцуулж буй нь өөрийн тэр туршлагатай холбоотой байж магадгүй гэж үзэж байгаа юм. 

Хэзээ тодорхой болох вэ?

Ойрын хугацаанд болох Хөдөлмөрийн намын их хурал олны анхаарлыг татаж буй. Учир нь энэ хурлаар Ким Жү А оролцох эсэх, ямар албан тушаалд нэрлэгдэх нь тодорхой болно гэж улс төр шинжээчид үзэж байгаа юм. 

Гэвч намын дүрмээр 18 нас хүрээгүй хүн албан ёсны гишүүн болох боломжгүй тул шийдвэр ил тод зарлагдахгүй ч байж мэднэ.